عـــــــــودة و فـــــودة
محمد حسن سالم حميد
مرحبتين يا جايي وراسِم .... فوق الشوق الفجر الباسم
خَفُّو المِزَن الزفُّّو مواســــم .... ودَّعنابَه الزمن الغاشــم
غوث يا الخَتِم الجدُّو الخاتِم....!!!!
أهلاً بيك يا زين يا طيِّب .... يا حَبُّّوب للظن ما يخيِّب
يا المبروك كلْمَا اَنتَ قريِّب .... فألنا مطيرة خير وهبيِّب
ندّت حالنا الأزمنْ كاتم....!!!!
يا عوّاض شعبك ما فاتو .... يا روّاض للريح وشـتاتو
يا بيّاض ظاهرو ونيّاتو.... السودان عاد بك بي ذاتو
ضوُّوا ليالِي الهوُّوا عواتم...!!!!.
قابض جمرك وين ما رُحتَ .... إتجرَّحْتَ جَدَع ما نُحـتَ
بخت النار يا صندل فُحت .... بي سر ألقك بُحْتَ ولُحْتَ
يا التخرجْتَنا راقي وعازِم....!!!!
نفسَك مِسْك الكلمة الطيْبَة .... الكلمة الطيبة بخور الباطن
ياتـو المـدِّي رِفَيْقو الهيْبَة ... وطـنك ولاَّ نَقـاك يا مـواطن
أم برَّاك الحضْرة يناغم...!!!!
عاشِق عصَر أشجانُو وساطن .... أم برَّاق القبلي يباطن
ضهر الغيم الدَرَّ العاطن .... بَرَدو أشواق الدرَت الراطِن
شال شبَّال الزيفة نسايم...!!!!.
حلفا تزِف لي نمولي قدومك ... بارا تبارِك لي سلُّومك
النيلين قلدَن خرطومك .... يا تأريخ إتقيََّف يومـك
يوم السعد أب موج متلاطم ...!!!!
جِيد بي جيْتك عودة وَفُودة .... ياتو طيوراً تجفَى بلوده
زي ما مكّـة إتلقُّوه وِفُوده .... الخرطوم ازدانت قُـوده
عديلة منفَّل زين وعفارِم ....!!!!
اض شعبك دي المريودة البيك مورودة والآماله .ظلُم موؤدة
المرفودة غُبُن موقودة .... ولسّــــه النار بين عنبر جـودة
بينك وبين أحلامه ملاحم...!!!!!
شــعبَك حُبّّك وربَّك عالم قلْبَك حـاني إنساني مسالم
دُغري وأماني مو صارِم وحازم..وكيف حقَّاني عليهو الظالم واليتفلْهَم
ْ خارم .. بارِم...!!!!!
يا ســجّانة حنفضَـل نفْتِلْ فـي صـنّانَة نصـارع وننْتِلْ
غاية القيد ما يصدأ وينصِلْ غُوث ومَدد والحاصِل يحصِل
ْ للفي القلبِ منُو البيداهم ؟ !!!!
بالنبُّوت بالبوت ....... بالطلقة بالشلُّوت
العلْقة الشنْقة وكتم الصُوت الزنْقة الخنقة .أبينا نموت
يا آخر سرْقَة و آخِر هاكِم.... فَكَّ الباكِم!!!!
أصـحَى ... يا نايم سَــمَّ الدايم ...الحيـاة أحـقَّ .... أسـرفنا ميآتم
رايمو جدار الحُزن الكاتم... خلُّوا يخشُّ على روضنا نسايم
طلْ وفراش والوردة تتايم....!!!!
عصفورين في الوطن اتْحَبُّو.... عاشو سَوى ويوم حَكمت غبُّو
طاهِر أسمر سـما لي ربُّو ...وطائر أخضـر همـى لي شـعبُو
أسمى السما ؟ولاَّ أهَمَى القادم ؟؟!!!!
جانا أبو هاشم جانا الناهم... غيم الغيث للوادي الجاهم
جانا الراعي الواعي الفاهم... دَرب الصاح من زربَ الواهم
شَيْ لِلَهْ يا حوض العاشم ....!!!!
كتَّر خيركن .. سودانيّة يُوت لي غيركن صافين نيَّة
قاشـِر طيركـن.. في حـريَّة عـازمَ الدنيا ديمـوقـراطية
ورادِم ..ثَمَر الجَدل الطاعم...!!!!
وياتو وفاق سوداني بيبقى ...ووين الوحدة بدونك تلقى
لونا الأسـمر شـفق الشرقة ...وكونا الأخدر توب المرقة
يا مَشْهاد الوطنْ السالم....!!!!
أغلى سلام على فِكرة سلامك ...أحلى كلام لي بُكرة كلامك