د. محمد ود بادي العكودابي يمدح صاحب السيادة مولانا السيد محمد عثمان الميرغني...

**أبو الحُسين**

أحبتي الكرام... أعضاء وزوار منتديات السادة الختمية سلامات وتحايا نواضر...

وجدت هذه القصيدة بصوت د. محمد ود بادي العكودابي ألقاها أمام صاحب السيادة مولانا السيد محمد عثمان الميرغني "حفظه الله" بطيبة الطيبة يمجد فيها ويمدح من مدحهم الله من فوق سبع سمواتٍ طباقا...

فقد أجاد الرجل فيها وأبدع وطوَّع حروف اللغة للتشرف بمدح حكيم السودان وحزبه الإتحادي الديمقراطي... فجزى الله خيراً ود بادي وزاده رفعة وشان وأجرى الحكمة على لسانه فهو الصادق المصدوق مادح الصديقين...

مركز الهاشمية

كلمات د. محمد ود بادي العكودابي

يا مهد الكرم يا منبع الوطنية
كم سوداني يفخَر بيك وسودانية
سنيت النضال في السلم في العلنية
ـــــــــــــــــ

عجيب يا الإتحادي أركان بُناكَ عتيَّة
أبو الوطنية ساسك كان سواعدُو فتيَّة
للجيل الجديد نهديك شعارنا هدية
وحدة سلام قيادة تكون ديمقراطية
ــــــــــــــــ

من الأزهري والهندي واحسب مية
أفكار الحزب والأنجُم المسمية
أبو هاشم ركز يوم شال حمالة المية
كاريزما الشهامة ومركز الهاشمية
ــــــــــــــــ

ياك تلِب الحمول ياكا العليكَ الركْ
جبل التاكا إنت الخاتي قُولةْ كَكْ
فيكْ من سر أبوكاَ ومن فراسة المَكْ
ومن بين الرجال الكلمة عندك صَكْ
ــــــــــــــــ

أبو هاشم قدَل يوم الرجِم والدَكْ
وارث للعُلاء وابن الشهيد لا شَكْ
المَعَقُود تحِلُّو العاقْدُو ماب ينفَكْ
تقطع كالصراط يوم العجِن والعَكْ
ـــــــــــــــــ

شوف هادِي العمايم والنفوس الطيبة
جات من الفِجاج تقصُد مرابِع طيبة
مَعمَّدة بالوجع بعد النضال والغَيْبَة
ماب ترجَع بلا شيتاً يرُد الهَيْبَة
ـــــــــــــــــ

دربَك يا زعيم قِدَّامُو رحلة عصيبة
حزب الإتحادي عصايْتَك التَّمْشِيبَة
كان قوِّيتَة هي التَدِّيك مناعة وهيبة
وان نَقَرَت حشاها السوسة تبقى مُصيبة
ــــــــــــــــــ

الأرواح فداك شيل من خيارك نَقَّة
غير كَتَرة كلام من غير لجاجة ونِقَّة
ميثاقاً غليييييييظ في المُهلِكَات ما رَقَّ
ما هَمَّانا في اللِّتْوَالة والإنشَقَّ
ـــــــــــــــــ

نحن القوم ونحن مثقَّفين وأشِقَّاء
نحن الإتحادي البي دِمَانا مَسَقَّى
نحن اهَل البلد إن جات نشيل نتوَقَّى
نحن اولادَها والولد النجيض ما عَقَّ
ـــــــــــــــــ

نحن أهل الفداء والسلسة المُمْتَدَّة
نحن اصحاب عقود طالت عليها المُدَّة
ابواتنا القِبيل عبَرُو ودليلهم عدَّ
نحن على المبادئ لا نكوص لا رِدَّة
ـــــــــــــــــ

نحن بلدنا ما تَحَلاَلْنا غيرها العيشة
ما بي نسيبها للدايِر يقَصْقِص ريشها
نجيب دستورها بالقانُون وننصر جيشها
والدين المغَشْغَش راح وفط العيشة

_________________
اللهم صلي وسلم على الذات المحمدية...
واغفر لنا ما يكون وما قد كان...

**أبو الحُسين**

وأوعدكم أحبتي ربنا يقدرني أنزل ليكم القصيدة بصوت الرائع د. ود بادي...

_________________
اللهم صلي وسلم على الذات المحمدية...
واغفر لنا ما يكون وما قد كان...

محمد عبده

الاخ ابو الحسين

تحياتي ،،،

ما شاء الله قصيدة جميلة ورائعة وملئة بالمعاني السامية والكلمات الطيبة ، وجزاء الله عنا ودبادي خير الجزاء على هذا النظم الجميل .

**أبو الحُسين**

محمد عبده كتب:

الاخ ابو الحسين

تحياتي ،،،

ما شاء الله قصيدة جميلة ورائعة وملئة بالمعاني السامية والكلمات الطيبة ، وجزاء الله عنا ودبادي خير الجزاء على هذا النظم الجميل .

حقيقي أخي محمد عبده فقد أجاد د. ود بادي وهو المُجيد في شعر الحماسة والفخر... وقد نوَّع القوافي وقد أعجبتني هذه القافية من بينها...

ياك تلِب الحمول ياكا العليكَ الركْ
جبل التاكا إنت الخاتي قُولةْ كَكْ
فيكْ من سر أبوكاَ ومن فراسة المَكْ
ومن بين الرجال الكلمة عندك صَكْ

حفظ الله ود بادي صادحاً بالحق دوماً...

وحفظ الله مولانا السيد محمد عثمان الميرغني وحزبه الإتحادي الديمقراطي منارةً لطريق الحرية والأمن والإستقرار...

أبو الحُسين...

_________________
اللهم صلي وسلم على الذات المحمدية...
واغفر لنا ما يكون وما قد كان...